يا بَيْك


وجيه الحايك

يا بَيْك ... يا يوسف كرم ... 
بالصَّلى وبالحياة إِنِتْ مَعنا، اليوم وكل يوم ... لإلك تَحِيِّة اليوم وكل يوم ... 

يا بَيك إهدِن اشْتاقِتْلَك 
يَلِّي حمَيتَا بمَسْبِحتَك 

الشَّهامِة والوَفَا صِفاتَك
العِزِّة والكَرامِة عِنْوانَك

يا بَيك الكَرَم مِيزاتَك
شادْ فيها زوّارَك

كِنت المِثال بإيمانَك
يا رَيتني كِنت من رجالَك

بِالبال بَعدٌ رجالَك
مَعَك حِميو بلادَك

يا بَيك ربِينا عَمحَبتَك
وصَلاتنا رفَعْناها إلَك

زغَرتا بَدْهَا تِحِضنَك
وإهدِن ناطْرا رَجِعتَك

يا بَيك بيوم عِرسَك
حَيِّ أهِل الزّاوية عَدَربَك

مَعُن عِشِت إيّامَك
وبِقيوا أعَز احبابَك 

الكِلّ رَح يشاركَك
فَرحِة العودة عَبَيتَك

إهدِن يا بَيك شَعبَك 
سَكَنْها واتْرَحَّم عأهْلَك

ورُودْ وِزلاغِيط محِبِّينَك 
يزَيّنوا عإهدن رَجِعتَك

النّاس فيها ناطِرتَك 
تِرجَع تِسكُن بِبَيتَك 

بكنيسة الميدان مَهْدَك
تشِعّ مِنّو قَداسْتَك 

حجَارْها بِرْدِت عَغيابَك
ونَاطرا دَفا إيمانَك

يا بَيك اغمِرها بحَنانَك
واحْميها لَديارَك 

بساحِة الكنيسة تِمثالَك
رَمِز البطولة وعِنفوانَك

يا بيك خَلّي نَظْراتَك
ع زغرتا الوَفيّة إلَك

يا بَيك البَخّور عِطْرَك 
فاحِت مِنّو طَهارْتَك

بتِسْمَع طَلْبَات زُوّارَك 
وبتذِكْرٌ يا بَيك بصَلاتَك

انشاالله َملَف تِطويبَك
يصير حكاية محبِّينَك

بَعِدها ينادو إسمَك
بِ روما وَقِت تِقْديسَك

شارك هذا الخبر